Эрон ўзбекситонликлар ва яна 31 та давлат фуқаролари учун виза режимини бекор қилди.
Мамлакат бутун дунёга ўз эшикларини очмоқчи экани таъкидламоқда. Бу албатта туризм соҳасида ривожланишнинг янги босқичи бошланишини билдиради, аммо янги бизнес имкониятлар ҳам очилиши кутилмоқда.
Эрон билан қайси йўналишларда ҳамкорлик қилиш мумкин?
• Туризм ва меҳмонхона бизнеси
Виза режими бекор қилингани боис туристик агентликлар фаолиятини йўлга қўйиш, Эронда туризм бозорига кириб бориш, меҳмонхона ва ресторан бизнесини ташкиллаштириш мумкин.
• Текстиль соҳаси
Эрон ўзининг текстиль соҳаси билан машҳур — ҳақиқий Эрон гиламлари, парда ва матолар, кийим-кечак савдосини йўлга қўйиш мумкин.
• Қурилиш материаллари
Керамик плита, мармар, гранит ва яна бир қанча пардоз материаллари ишлаб чиқариш борасида Эрон яхши натижаларга эришган. Ўзбекистонда ҳам қурилиш соҳаси жадал ривожланиб бормоқда, шу боис янги ва сифатли маҳсулотлар бозорда талабга эга бўлади.
• Тиббиёт соҳаси
Тиббий ускуналар, дори-дармонлар (фармацевтика) йўналишида бизнес-ҳамкорликни йўлга қўйиш имконияти мавжуд. Хорижий мутахассисларни жалб қилиш ҳам хусусий клиника йўналишида ижобий натижа бериши мумкин.
• Озиқ-овқат саноати
Эрон 100 дан ортиқ мамлакатга қандолат ва шоколад маҳсулотларини экспорт қилади. У ҳалол озиқ-овқат маҳсулотлари таъминотчиси сифатида ҳам танилган.
Экспертлар тахминларига кўра, Эронда бизнес ҳамкорлик учун ижобий муҳит яратилаётгани боис яқин йилларда энг муҳим соҳалар рақобатчилар томонидан банд қилинади. Шундай экан, тадбиркорларда бу мамлакат билан икки томонлама манфаатли ҳамкорликни йўлга қўйиш имконияти бор. Аммо бунда халқаро валюта ва савдо қонунчилиги меъёрларига риоя қилиш, баъзи чекловларни ҳисобга олиш керак бўлади.